Wednesday, August 15, 2007

تحت التهديد

........ كل يوم ننام ونقعد على تهديد
وتهديد شديد اللهجة علشان ما تنقطع الحل بالترشيد
ويتصلون تلفون يقولون منطقتكم اكثر منطقة فيها ضغط وراح نقطع الكهرباء عنكم واحنا على الله نصدق والمشكله انهم داقين على الكويت كلها وقيلين نفس الحجي يهددونهم بالقطع
منوا يصدق هذا يصير , والله شيء لا يعقل ولا يصدق احنا في ديرة الخير فيها يعم ولله الحمد بنينا محطات توليد برا الديرة و نقدر نبني محطات توليد بدال لا نسوي محطة توليد طاقة وحدة نقدر نسوي عشر وعشرين بعد لكن ثلاث محطات كافية لنا بس تكون على مواصفات علية الجودة و مولدات كبيرة الحجم ولها سعات انتاجية كبيرة طبعا مثل منتوا عارفين الكويت فيها خمس محطات توليد للكهرباء وللأسف مستغلة بشكل غير صحيح
تاريخ نشأت الكهرباء بالكويت
• في سنة 1934 انشأة أول محطة كهربائية لتوليد التيار المستمر وكان فيها مولدين لكل مولد قدرة (30) كيلوواط , وكان عدد المشتركين في ذلك الوقت (60) مشترك
طبعا على شان ماتقولون هذا قاعد يتكلم على كيفا ويتفلسف انا عملت بحث سنة 2005 بالمشاركة مع جمعية حماية البيئة الكوينية
وقمنا بحملة للمدارس والنوادي الصيفية كان اسم الحملة هو الحملة البيئية التطوعية لترشيد استهلاك الكهرباء


ما هو الترشيد ؟
الترشيد في استخدام الكهرباء هو استغلال اقل قد ممكن من الحاجة للطاقة ويعني ايضا الاستخدام العقلاني للكهرباء وعدم الاسراف او التبذير ويعني ذلك الاستغلال الامثل لهذه الطاقة المهمة



طبعا مابي اذكر احصائيات لكن بشرح لكن شلون نقدر نستفيد من الطاقة الي تنتجها محطات الكهرباء
والي يبي احصائية يحصلها موجودة عندي بالكتاب السنوي للوزارة طبعا ممنوع يطلع الكتاب بس مكو شيء ممنوع بالديرة


اول نقطة اكتشفناها من البحث هي ان كمية الكهرباء المنتجة من جميع محطات توليد الطاقة في الكويت تتناسب طرديا مع الاستهلاكهذا دليل
على ان الكهرباء المنتجة بالكويت جيدة وتكفي وتوفي لسنا بحاجة لترشيد
بذكر لكم النقاط الاساسية الي انا عرفتها من الاحصائيات من خلال البحث





  1. اعلى معدلات استهلاك في اشهر الصيف أي ما يقارب 8000 ميجاوات
  2. وقت ذروة الاستهلاك من الساعة 2 إلى 5 مساء
  3. معدل الاستهلاك في الشتاء ينخفض إلى 4000 ميجا وات
  4. 70% من الاستهلاك تبريد وتكيف
  5. لكلفة على الدولة 35 فلس / كيلوا وات ساعة المواطن يتحمل 2 فلس / كيلوا وات ساعة الشاليهات 10 فلس / كيلوا وات ساعة اي ان تكلفة الكهرباء على الدولة 12 فلس \كيلو وات
  6. تكلفة انشاء محطة توليد كهرباء في الكويت


    . ليس هناك مبلغ محدد لتكلفة انشاء المحطة ولكن المبلغ يعادل المليارات للمحطه الواحدة وهذه مبالغ ضخمة جدا
    مدة انشاء محطة جديدة للتوليد الطاقة هي 5 سنوات . هذه مدة طولة جدا يجب على المسؤولين الاسراع لإيجاد حل

• طبعا الكهرباء ليمكن تخزينها مثل الماء لأنها تسري بالكيبلات و الي يستخدمها يستفيد منها والكهرباء الغير مستخدم تتحول من طاقة كهربائية إلى طاقة حرارية داخل الكيبلات ومن ثم تتبخر بالهواء
لأن مثل ما احنا عارفين بان الطاقة تتحول من صورة لأخرى عن طريق عدت عوامل مبي ادش بالتفاصيل بس هذا الي خذيناه بالعلوم بالمتوسطة لوووول

و في دراسة قامة بها المهندسة \ دينا النقيب من معهد الكويت للأبحاث العلمية
اكتشفة لو ان الوزارات والمدارس الحكومية استخدمة المصابيح الموفرة للطاقة لستطاعة الكويت ان توفر نسبة 40% من الطاقة الكهربائية
هذا واذا اسخدمنا نحن بالمنازل هذه المصابيح لوفرنا اكثر من 40%
ليش الحكومة ماتستخدم هذه المصابيح بدال حملات الترشيد المصروف عليها الملايبن ووفرة علينا 40% من الطاقة وممكن اكثر لأن المدارس بالصيف لا تعمل
وليش مانستخدم طاقة بديلة مثل الطاقة الشمسية الي نعرف ان الطاقة تتحول من صورة إلى صور اخرى ليش ما نحول الطاقة الشمسية إلى كهربائية
واعتقد هذه اسهل طريقة ومجربية في اوربا وغير مكلفة بالصيانة و محافظة على البيئة
لأن محطات توليد الطاقة تحتاج لحرق كميات كبيرة من الوقود لتحريك التوربينات والطاقة شمسية نستفيد ونحافظ على البيئة بفس الوقت

فية كلمة اذكرها للباحث الفلكي الدكتور \صالح العجيري الله يطول بعمرة
يقول ياكويتين إذا خلص النفط لا يضيق خلكم ترى عندنا شمس نستفيد منها ونشغل ديرتنا والديرة الي يمنا

ليش يا مسئولن ماتسمعون كلام هذا الرجل لأن والله يقول حكم
شاطرين بس يقولون لنا من حبنا لها نوفر لها والوزارات اكثر مكان قاعد يستخدم هذه الكهربا ء

انا عندي اقتراح, عندنا البر فاضي مافيه شي نص المباني على البحر ليش ما نحط بالبر خلايا ضوئية مالت الطاقة الشمسية وبطاريات نخزن فيها الطاقة ونستخدمها الصبح وتصير كهربتنا من الشمس وباليل من محطات التوليد اعتقد من النادر انا نشوف غيم بالكويت الي يحجب الشمس فيعني الكهربا الصبح شغالة 100% وباليل 100% وبلا ترشيد بلا تهديد كل يوم
ونخلي الكويت منورة مثل ما يقولون غيرنا نخلي الدوحة منورة ويتشمتون فينا
هذا مخطط يبين الكويت و العالم ونصيب استهلاك الفرد من الطاقة

انا زرت محطة الدوحة اثناء عملي لهذا البحث





صراحة انصدمت من عقلية المسؤولين المهنس وهوا يشرح لنا يقول هذه المحطة بنيناها بالثمانينات وراح نبني محطة نسخة منها بالزور اعتقد الحين خلصت هذه المحطة وشغاله الحين ويقول نفسة المهندس للاسف المسئولين ماطوروا من هذه المحطة نهائيا بنوها بنفس الطريقة ونفس الاجهزة المستخدمة حتى نفس مخطط المحطة وتوزيع الاجهزة حتى لم يتلاشوا عيوب هذه المحطة ويقول ممكن ان نطور من هذي المحطة الجديدة بشكل كبير من الثمانينات و الان نحن 2005 اكيد كل شيء تغير لكن المسؤولين لم يعملوا اي دراسة ولا اي بحث وانتهت المناقصة وبنية المحطة

احنى بديرة للأسف الكل يدور على مصلحتة الشخصية جم واحد استفاد من هذه المناقصة الي ما استفدنا احنا منها إلا شي واحد كل يوم اينا تهديد بالقطع
من سنة 1934 ما واجهتنا مشكلة مثل هذي المشكلة هذا كلة صار والسبب تقصير من المسؤولين والسعي من اجل مصالحم الشخصية




طبعا موضوع يحتاج لمناقشة اكثر بس هذا الي اقدر اقوله وحبيت اخلي الباجي عليكم انتوا لان كل كويتي ادري بقلبة كلام ودة يقولة





وفي الختام ماراح اقول غير من حبي لها بوفر لها






وشكرا لكم

10 comments:

Anonymous said...

no one believe them but if u think about it u will see that they are planning for some thing bigger than that So .... alla yaster mn elyay
thanx :)

QiYaDiYa said...

موضوع قيم جدا ...

خالي مهندس و قال نفس هالكلام ..
انه مافي تطوير للمحطات و انه كثير من المهندسين توقعوا حدوث هذي المشكلة و قدموا حلول لها ..
لكن للأسف تمت في الادراج بسبب الناس الي تهمها مصلحتها فقط !!!

عندنا بالديرة اصحاب الكفاءة الي يقدرون انهم يقدمون الحلول المنطقية الي من خلالها تقدر الدولة تتخطى هالمشكلة ..
لكن مين يسمع !

و فكرة الطاقة الشمسية لو تتطبق المؤشر مو بس يصير اخضر ..
الا ننسى انه في مؤشر نخاف منه و يهددنا ليل نهار !

و عموما حملة ترشيد حملة قوية و مؤثرة ..
لكن وقتها جدا غلط ..
و كنت اتمنى انه يبينون للناس انه الترشيد في استخدام الكهرباء و الماء نابع من ديننا الاسلامي اولا ..
و تدعيمها بالآيات القرآنية و مواقف من السيرة النبوية ..

شكرا لك على الموضوع ..
و عذرا على الاطالة =)

Anonymous said...

شكرا

اخى الكريم على هذا الموضوع

Sulaiman_Q8 said...

BrEaThLeSs ChaRm

shran 3la almror oO f3lan y5a6-6on 7ag shay akber oO alah y3ina a7na


QiYaDiYa

فعلا اختي اصحاب الكفاءة مظلومين ومالهم مكان بالديرة والي يحب مصلحتة تلاقينا ماسك احسن المناصب
ولو الحملة تطرقة للجانب الديني كانت افضل

ابو شملان

شكرا لك على مرورك

Unknown said...

اقولك شى :)

ما ابى اوفر الجو موووت وحر وقيلة
وانا اطالب الوزارة فلوس دافع لهم
credit

فمن حقى انى اخذ الخدمة بالشكل الصحيح

اهم يخورنها وانا ابتلش:)

موضوعك جدا قوي وحساس وبحث تشكر عليه ولكن تأكد المسؤولين من سنة 1993 واهم تنبأوا بالمشكلة ولكن لا حياة لمن تنادى

Sulaiman_Q8 said...

اي والله يا مشاري من حقك

::heba:: said...

اول شي يعطيك العافيه يا سليمان
على الموضوع ..وعلى الدراسه الي اجريتوها بالسابق ....

طبعا حمله ترشيد ..ماقول الا تبذير لاموال الدوله كان بامكانهم توفير هالجم مليون وبناء محطه للديره

المشكله ان الكويت قاعده توزع فلوسها وتبين لدول الثانيه محطات والي صدمني مره قريت بان الكويت بانيه محطه لتوليد الكهربا بنيوجرسي بالولايات المتحده كلفتها ملايين الميلايين

واما الديره فنكتفي بحمله ترشيد !!!

احد الصحف الفرنسيه نشرت بأحد ملحقاتها بفقرة تسمى غرائب العالم وذكرت بكل سخريه عم دوله غنيه بالعالم تشن حمله غريبه على شعبها بتخفيف استخدام الكهرباء والا القطع فماذا لو لم تكن دوله غنيه !!!


شي يعور القلب !!

Sulaiman_Q8 said...

شكرا لج اختي هبة على المرور

صج والله شي يعور القلب
وصرنا مطنزة للعالم

Dana__23 said...

أولاً يعطيك العافيه يا سليمان على هالدراسه والموضوع ..

صراحه شي يحر إنه دريتنا خيرها لغيرها !!

بدل ما يسون محطات يديده .. صاروا يسون ترشيد ويقطعون علينا الكهربا بعز الحررر ..

الحمدلله إحنا نعتبر من الدول الغنيه ... بس وين فلوس ديرتنا ؟؟؟

كل فلوزس ديرتنا حق بره للأسف !! بدل مايسنعون ديرتنا للأفضل ... صاروا يسنعون الغرب وإحنا مطنشين فينا !!

الله يسامح حكومتنا بس صج خيرنا لغيرنا للأسف ..

ماني طابه أكثر أخاف يمسكوني ;D

ماقول غير الله يحفظ ديرتنا وشعبها يارب :)

kuwaitya_7saweya said...

تدري شلي بيط الجبد انه على ناس وناس
واللي يبط الجبد اكثر المبالغ المدفوعه على هذي الحمله
وهم اللي مو بس باط جبدي هم قاهرني
انه متبرعين حق دوله نسيت اسمها عشان يبنون محطه كهربا
انزين مو احنا أولى
؟؟؟؟؟؟؟؟؟؟؟؟؟؟

ويعطيك العافيه