Sunday, August 12, 2007

بصراحة احلى .....!!!!

أول موضوع ببدي فيه اهوا هذا الموضوع
لان صراحة انتشر بسرعة البرق ومادري ليش ....؟؟
قالي واحد من الربع أول يوم شفت وحدة بالجامعة مسوية جذي وضحكت ثاني يوم شفت ثلاث الي بعده زادوا وصاروا عشرة بعد سبوع نص الجامعة جذي ليش شسالفة لووووول يقولون موضة اي موضة انتوا مع الخيل ياشقرة ماتدرون وين الله قاطكم " تبون تعرفون شنو الموضة وشنو سرها " انا اقولكم



الموضة اهيا حجاب بو تفخة هذا الي قاعدين تشوفونا بالصورة
بعد البحث والتحري اكتشفت الخلطة السرية لهذا الحجاب

طريقة التحضير الحجاب:-
1- تذهب البنت لتشتري روب من الجمعيية وتفرق الروب على ويها ليزيد من نضارة بشرتها

2- تغسل علبة الروب جيدا بالماء والصابون
3- تأخذ علبة الروب وتضعها على رأسها ومن ثم تلف اللفة فوق علبة الروب لكي يظهر لنا هذا الشكل

لم تنفعهم علبة الروب من ذكاء البنات صاحبات حجاب بو تفخة طوروا علبة الروب " ليس تطوير بل تغير " صارت البنت تذهب لتشتري نخي وباجلة وتقول لصاحب المحل " عطني نخي وباجلة و قوطين فاضين والي عافيك "
ماكفاج قوطي الروب الحين قوطي نخي الله يسامحكم بس
اليوم انصدمت اكثر لقيت انة قوطي النخى والرب صاروا قديمين الحين كلة علبة برنقلز وساعات بطل ماي مقصوص بلط كبير مو الصغير " عفية راس يتحمل
وبعدين اصحاب المحلات استغلوا الفرصة وبدأو يسون شباصات فيها قوطي نخي ومخفي على شكل شعر ويقصون عليهم بالاسعار بعد... والمساكين امهات روس متفوخة يشرون على الله



إلى ان وصلوا اخر الاختراعات الي اهيا فيبر قلاس على شان يكون ثابت وبنفس الوقت تستفيد منه كتانكي حق الماي ,,,,,

ولا تزال الاختراعات مستمرة ..................................



البنت صاحبت الحجاب بو تفخة ما تلتفت كلش اذا كانت طالعة مع رفيجاتها لأن راسها عود تخاف تكفخ الي يمها .....!!!
طبعا هذيلي البنات دايما النفسية واصلة للخشم والراس مرفوع .... والسبب : لان اي حركة ممكن ان تسبب بسقوط الي على راسها
الحجاب من كبر حجمة ينشاف من على بعد اميال .. يعني شوفوني انا متحجبة ومع هالحجاب لازم تلبس إسترج...!!!!من المشاكل الي تواجها صاحبات هذا الحجاب انهم لا يستطيعون دخول جميع المحلات والمطاعم لصغر بعض الابواب

اسغفر الله اللهم لا شماتة
اعتقد هذلي البنات ماقروا هذا الحديث
‏‏" ‏صنفان من أهل النار لم أرهما قوم معهم سياط كأذناب البقر يضربون بها الناس ونساء ‏ ‏كاسيات عاريات ‏ ‏مميلات مائلات رءوسهن كأسنمة البخت المائلة لا يدخلن الجنة ولا يجدن ريحها وإن ريحها ليوجد من مسيرة كذا وكذا " رواه مسلم

انا ماقول إلى الله يهديكم انشاء الله ويهدي الجميع
وشكرا


14 comments:

Anonymous said...

lol wa a5iiiiiran a7ad tkalam coz 9ra7a enough is enough
lol thaaaaanx

Sulaiman_Q8 said...

صراحة موضوع ما ينسكت عنه ولازم الواحد يتكلم وشكرا على مرورج وتعليقج

Dana__23 said...

إي والله يا سليمان .. مادري شصار بالدنيا ..
الله يسلتر على بناتنا يارب ويحفظهم ..
خلصوا قواطي الروب وراحوا حق قواطي الباجيلا والنخي لوووووول ;p
ياتتحجبون عدل ولا لاتتحجبون أحسن ..
الله يهديهم انشاء الله ويهدي الجميع يارب ..

تسلم على هالموضوع :)

Sulaiman_Q8 said...

شكرا لج يادانا على المرور والتعليق

Anonymous said...

اخى سليمان


الموضه وما ادارك ما الموضه

لما اشوف البنات او الشباب اللى حيل متاثرين بالموضه وبشكل يتنافى مع عاداتنا وتقاليدنا

يصيبنى احباط شديد


نشوف رياييل بس مع الاسف بنات من مشيتهم ولبسهم وكلامهم

واذا حاجيته قالك الموضه

وبنات الله وكيلك لابسه من غير هدوم :)

وقولك موضه


شكرا اخى العزيز على البوست الرائع

Sulaiman_Q8 said...

شكرا لك اخي بو شملان على المرور

صراحة صار كل شي بهالدنيا موضة وكل ماكلمتهم ولا نصحتهم قالوليك هذه الموضة

wafa'a said...

قرأت عن هذا الموضوع في الانترنت من ذي قبل ، و سمعت و تناقشت به خارج نطاق الانترنت .. لكن هذه المرة الأولى التي أقرأ فيها عن هذا الموضوع بصبغة فكاهية..

أضحكتنا أضحك الله سنك ، و أبكيتنا على حالهن فلم نجد سوى الدعاء لهن بالهداية.

تحياتي لك

Sulaiman_Q8 said...

loyalty


شكرا على المرور والتعليق

Dental said...

9ara7a ma9o5ooha :)

o 5o9o9an etha kanat wa7da qa3da gedamek fe el mo7a'9ara o taby tanqel ely makotoob 3ala el 9aboora , o foq kel hatha edany yemeen etlef yemeen et7awel etshoof men el yesar danat yesar??

9arat fe 9adeqty o qalat 7aq DR, DR many qadraashoof men rasHa :D

Sulaiman_Q8 said...

Dental

شكرا على المرور
وصراحة الله يعينكم بالمحاضرات انا الحين سمعت خبر يديد يقولون قموا يستخدمون غطاء الابجورة

الله يهديهم

Unknown said...

صار عادى الحين الله يستر على بنات المسلمين بس
هذا الواحد اللى يقوله

Sulaiman_Q8 said...

شكرا لك يا مشاري على المرور والتعليق

Ra-1 said...

Hahha :)
عجيب شرحك والتوضيح مع الصور
LOL :p

Sulaiman_Q8 said...

Ra-1
حياج الله